ចង់ដឹងអំពីវិធីដាំដុះដំណាំបែបធម្មជាតិ ទៅលេងផ្ទះកសិដ្ឋានឯកំពង់ឆ្នាំងនេះឯង!
កំពង់ឆ្នាំង៖ នៅរីសតផ្ទះកសិដ្ឋានស្ថិតក្នុងស្រុកសាមគ្គីមានជ័យនៃទឹកដីកំពង់ឆ្នាំង ភ្ញៀវមិនត្រឹមតែអាចទទួលបាននូវសេវាកម្មស្នាក់នៅក្នុងផ្ទះឈើបុរាណ និងទទួលអាហារស្រស់ៗផលិតចេញពីកសិដ្ឋានផ្ទាល់ប៉ុណ្ណោះទេ ប៉ុន្ដែថែមទាំងទស្សនា និងស្វែងយល់ពីការដាំដុះដំណាំ និងចិញ្ចឹមសត្វផងដែរ។
ផ្ទះកសិដ្ឋានបានប្រើប្រាស់ដីជាង ១០ ហិកតា លើផ្ទៃដីកសិកម្ម ២០ ហិកតា ដើម្បីដាំដំណាំបន្លែបង្ការជាង ៣០ ប្រភេទ ចាប់ពីបន្លែស្លឹក ជីរ ដើម ផ្កា ផ្លែ និងមើមថែមទៀត ស្រះចិញ្ចឹមត្រី និងមាន់ជាដើម។
លោក ស៊ី សុវ៉ាត ជាអ្នកគ្រប់គ្រងនៅផ្ទះកសិដ្ឋាននៃអង្គការតុកកែញញឹម បានប្រាប់ ភ្នំពេញ ប៉ុស្ដិ៍ ថា៖ «យើងបែងចែកតំបន់ជា ៣ ផ្នែកធំៗ ដូចជា កន្លែងបណ្ដុះ កន្លែងដំណាំ បិទជិត និងដំណាំកណ្ដាលវាល»។
លោកថា៖ «ក្នុងវិស័យកសិកម្ម យើងធ្វើការជាមួយជីវិត ដែលមិនងាយស្រួលប៉ុន្មានក្នុងការដាំដុះ និងថែទាំជីវិតឡើយ។ បើចាប់ផ្ដើមមកមិនល្អ ពួកវាអាចងាប់ពាក់កណ្ដាលដែរ»។
ដោយចាប់ផ្ដើមរយៈពេល ៤ ឆ្នាំ និងកំពុងត្រូវបានពង្រីកបន្ថែមឱ្យកាន់តែធំក្នុងការបំពេញតម្រូវការខ្ពស់ ដើម្បីឱ្យដំណាំមានទិន្នផលល្អ លោក សុវ៉ាត បានផ្ដោតលើកត្ដាមួយចំនួន។
លោក សុវ៉ាត បានរៀបរាប់លម្អិតអំពីវិធីដាំដុះចំពោះអ្នកស្រឡាញ់កសិកម្មបែបធម្មជាតិថា ទី១ កសិករមើលទៅលើដី ដែលមានធាតុផ្សំទាំងជីរ និងការបំប៉ន។ ទី២ វាទាក់ទងនឹងកត្ដាទឹក ដែលទាមទារកសិករត្រូវដឹងថា ដំណាំប្រភេទណាត្រូវការទឹកច្រើន និងដំណាំណាត្រូវការទឹកតិច។
បុរសវ័យ ៣២ ឆ្នាំ ដែលខិតខំសង្គ្រោះដីធ្លាប់តែជាខ្សាច់ខ្សោះជីវជាតិរូបនេះបានបន្ដថា មួយទៀត គឺសារធាតុចិញ្ចឹមទាក់ទងនឹងដីទៀតថា តើវាត្រូវការសារធាតុចិញ្ចឹមកម្រិតណា ទៅតាមប្រភេទដី និងប្រភេទដំណាំ។ ចុងក្រោយ គឺជាការគ្រប់គ្រងកត្ដាចង្រៃ (IPM) រួមទាំងការគ្រប់គ្រងសត្វល្អិត និងជំងឺផ្សេងៗ។
លោកនិយាយនៅក្នុងសួនផ្សាំកូនរុក្ខជាតិថា៖ «បញ្ហាជំងឺដល់ដំណាំ រួមមាន ជំងឺផ្សិត និងជំងឺបង្កដោយវីរុស។ ប៉ុន្ដែជាទូទៅ ជំងឺវីរុស យើងមិនអាចព្យាបាលវាបានទេ ដោយការដកដំណាំនោះចោល ហើយជំងឺផ្សិត យើងអាចបាញ់ថ្នាំទ្រូកូឌើម៉ា (trichoderma)។ យើងក៏ប្រើប្រាស់អន្ទាក់មួយចំនួនដូចជា អន្ទាក់ក្រដាសស្អិត និងអន្ទាក់ស្រាំងជាដើម។
លោកបញ្ជាក់ថា៖ «ជាកសិកម្មសរីរាង្គ ការប្រើប្រាស់ថ្នាំបាញ់លើសត្វល្អិត មិនមែនអាចសម្លាប់ពួកវាបាននោះទេ។ ភាគច្រើន ប្រសិទ្ធភាពរបស់វាត្រឹមបណ្ដេញសត្វល្អិតចង្រៃ។ នៅទីតាំងខ្លះ យើងដាំផ្កាមួយចំនួន ដូចជា ស្បៃរឿង ឬខ្ទឹម ដែលអាចបំភាយក្លិនបណ្ដេញសត្វល្អិតផងដែរ»។
ឆ្លើយនឹងសំណួរពីសំណាក់ភ្ញៀវ ដែលមានបំណងដាំដំណាំបន្លែបន្ដិចបន្ដួចក្នុងបរិវេណផ្ទះអំពីការកម្ចាត់សត្វខ្យងល្អិតៗ ដែលស៊ីកូនរុក្ខជាតិទើបចាប់ផ្ដើមដុះ អ្នកគ្រប់គ្រងផ្ទះកសិដ្ឋានបានឱ្យដឹងថា វិធីសាមញ្ញ និងងាយស្រួល ម្ចាស់ដំណាំកាត់កំប៉ុង រួចកប់ក្នុងដីប្រហែលកន្លះតឹក និងឱ្យមាត់លើស្មើនឹងផ្ទៃរបស់ដី។
លោក សុវ៉ាត ដែលត្រៀមខ្លួនឆ្លើយរាល់សំណួរទាក់ទងនឹងកសិកម្មបាននិយាយថា៖ «បន្ទាប់មកយើងចាក់ទឹកស្រាបៀរចូលត្រឹមពាក់កណ្ដាលនៃកំប៉ុង។ សត្វល្អិតចង្រៃទាំងនោះនឹងវារចូលទឹកស្រាបៀរ និងងាប់នៅទីនោះ»។
ចំណោមដំណាំជាច្រើនប្រភេទ ភ្ញៀវដែលដើរទស្សនាសួនបន្លែបៃតងស្រស់ហាក់ចាប់អារម្មណ៍នឹងចម្ការវ៉ានីឡា ជាដំណាំថ្មីសន្លាងមួយប្រភេទរបស់ផ្ទះកសិដ្ឋាន ដែលអ្នកគ្រប់គ្រងសួនមានសុទិដ្ឋិនិយមចំពោះលទ្ធភាពនៃការផ្ដល់ផលរបស់វា។
ស្ថិតក្នុងសួនដំណាំវ៉ានីឡា ដែលកសិដ្ឋានទើបចាប់ផ្ដើមជិត ៤០ គុម្ព ក្នុងរោងបិទជិត លោក សុវ៉ាត បានឱ្យដឹងថា ផ្លែរបស់វាដែលត្រូវបានហាលសម្ងួតរួច និងចងជាបាច់ៗ មានតម្លៃចន្លោះពី ៥០០ ទៅ ៧០០ ដុល្លារ ក្នុង ១ គីឡូក្រាម អាស្រ័យលើចំណាត់ថ្នាក់របស់វា។
លោកបាននិយាយថា៖ «វ៉ានីឡា អាចផ្ដល់ផលនៅចន្លោះពី ៤ ទៅ ៥ ឆ្នាំ អាស្រ័យលើការកាត់ទងចាស់ ឬក៏ខ្ចីផងដែរ។ បើសំណាងល្អ ឆ្នាំក្រោយ វានឹងចេញផ្កា អាចបានផល។ តែអត់សំណាងទេ យើងត្រូវរង់ចាំបន្ដទៀត ហើយគ្រាន់តែចន្លោះពីការចេញផ្កាទៅចេញក្ដឹប ក៏វាត្រូវការពេលវេលាប្រមាណ ៩ ខែឯណោះ»។
លោកអះអាងថា៖ «វ៉ានីឡា មានលក្ខណៈខុសប្លែកពីរុក្ខជាតិដទៃត្រង់ថា រុក្ខជាតិទូទៅត្រូវការឃ្មុំជាអ្នកនាំលម្អងកេសញីឈ្មោល តែចំពោះវ៉ានីឡា យើងត្រូវប្រើដៃក្នុងការផ្សាំកេសញី និងកេសឈ្មោល»។
ផ្ទះកសិដ្ឋានរបស់អង្គការតុកកែញញឹមកម្ពុជា ស្ថិតក្នុងឃុំត្បែងខ្ពស់ ស្រុកសាមគ្គីមានជ័យ ខេត្ដកំពង់ឆ្នាំង ចម្ងាយប្រមាណ ៧០ គីឡូម៉ែត្រពីរាជធានីភ្នំពេញ៕
ប្រភពដើម ៖ https://khmer.rvasia.org
សម្រួលដោយ ៖ រៀនដើម្បីធ្វើស្រែ
ចូលចិត្តបន្លែធម្មជាតិ
ReplyDeleteអាចរស់បានយ៉ាងស្រួល អរគុណហើយ
ReplyDelete